கழுதைக்கண்ணி

கழுதைக்கண்ணி
ஜெகதீசனுடைய திருமந்திரத்தை
ஜெபியாதவனொரு கழுதை	(1)
தேடிப்புதைத்து வைத்துண்ணூமற்
றிரிபவனொரு கழுதை	(2)
சுகமேவடி வாம்பரமசாதுக்களைத்
தூசிப்பவனொரு கழுதை	(3)
சுருதியினெறிதனையுணர்ந்து மதில்நிற்கத்
துணியாதவனொரு கழுதை	(4)
அகத்தினிற் பெண்டீரிருக்கப்பிறநாரியை
யணைபவனொரு கழுதை	(5)
அனுதினமும் பலஜீவஹிம்சைசெய்
தருந்துபவனொரு கழுதை	(6)
அகத்தினிற் பரசிவஞ்சாக்ஷியாயுண்டென்
றறியாதவனொரு கழுதை	(7)
அரிகதை சிவகதை மகிமைகளறியா
தலைபவனொரு கழுதை	(8)
தகதகவெனவேயாடுஞ் சிற்றம்பலந்
தனைத்தொழாதவனொரு கழுதை	(9)
சந்ததமுகங்காரமே வடிவாய்ச்
சஞ்சரிப்பவனொரு கழுதை	(10)
இகமேசதமெனப் பரத்தினைமறந்துபோ
யிருப்பவனொரு கழுதை	(11)
எல்லார்க்கும் புத்திசாலித்தானடங்காம
லிருப்பவனொரு கழுதை	(12)
மகவுமனைவிமுதற் சொற்பனமேயென
மதியாதவனொரு கழுதை	(13)
மதியற்றே மதுபானங்களைப்பண்ணி
மயங்குபவனொரு கழுதை	(14)
முகத்திற்கண்ணிருந்தும் பிறர் துக்கமறியா
மூடனொரு கழுதை	(15)
முற்றிலுந்தான் கண்டநிலைதன்னினில்லா
மூர்க்கனொரு கழுதை	(16)
கல்விகற்றதெல்லாம் பரத்தையுணர்தற்கெனக்
காணாதவனொரு கழுதை	(17)
கனவானெனத்தன்னைத்தானே மதித்திடுங்
கதியிலியொரு கழுதை	(18)
குருசொன்னமந்திரந்தனை விற்றுப்பிழைக்குங்
கொடியோனொரு கழுதை	(19)
குற்றமதனைத் தள்ளிப் பார்க்குந்தந்தையைத் தள்ளுங்
கூரற்றவனொரு கழுதை	(20)
பொதுவாய்ச் சொல்வதைத் தனக்கென்றபிமானித்துப்
புலம்புவோனொரு கழுதை	(21)
புண்ணியபாவந்தெரியாதேகாலம்
போக்குவோனொரு கழுதை	(22)
கழுதைக்கண்ணி முற்றிற்று